Ingiò as poja cumprar e baiver – in Engiadina?

Scha Tü hast da Tschlin üna bierina
Schi est Tü giast in Engiadina
Scha Biera da Tschlin a chasa At laschast gustar
Vain l’Engiadina pro Tai At visitar.

Dal 2008 vaina furni ca. 500 hl Biera da Tschlin in Engiadina. 60% da quella es gnüda vendüda in butias dal VOLG e 40% in restorants, hotels e chamonnas da muntogna.

Quai cumprouva cha la biera es inragischada bain pro’ls indigens e pro’ls giasts da l’Engiadina chi stan in abitaziuns da vacanzas. Nus ingrazchain a tuot las fidelas boccas finas chi giodan la Biera Engiadinaisa®.

Nus ingrazchain als commerciants da mangiativas, surtuot al VOLG. Pro els as cugnuoscha la «funtana da la biera da Tschlin» pel solit vi d’ün clucher da nossas harassas brün s-chüras e natüralmaing vi da la cuntschainta butiglia cull’ «etiketta da binderina» cun sü il «buorf da BIO-SUISSE».

Heineken es nos partenari da logistica in Engiadina. Heineken Scuol retira ils pallets cun minchün 40 harassas pro nus a Tschlin e tils furnischa a sia filiala a Samedan. Tuots duos scumpartan la biera a las butias ed a las ustarias.

La chadaina logistica funcziuna fich bain – sainza gnanc'ün disturbi dürant tuot l'on 2009. La Bieraria Tschlin ha ingrondi in avrigl la capacità dals tancs da deposit sco eir quella da las equipas d’imbutigliar.

Daspö mai 2010 ans occupaina activmaing culla chüra, culla cussagliaziun e cull'acquisiziun da la cliantella. No collavurain cun Cafè Badilatti da Zuoz. Sar Werner Engi (guarda «contacts») fa visitas a commerciants ed usters per Cafè Badilatti e Biera Engiadinaisa. Il cumanzamaint para d'imprometter üna pruna, la collavuraziun funcziuna: Badilatti aquisiziun, Heineken logistica e Bieraria Tschlin producziun.

Suot «rebomb da las medias» chattan ils commerciants e’ls usters material adattà per chargiar giò per pudair far lur propaganda e per documentaziuns.