Perche biera a Tschlin?

Scha no lain esser sincers stuvaina dir chi’d es stat e chi’d es ün’idea strana da far biera a Tschlin. Stran i’l sen da «bandunar ideas cun tradiziun». Tschlin nu vaiva üna tradiziun da biera, l’Engiadina üna tala da pitschn’importanza. Duos indizis as poja construir: A Tschlin as cugnuoschaiva la cultivaziun da granezza, sgüra eir da l’üerdi, chi toccaiva pro’l graner da l’Engiadina – e – i d’eira üsit cha’ls paurs e’ls mansterans faivan üna tscherta bavronda pels lavuraints chi cuntgnaiva bler amet e bleras calorias, dit cun oters pleds: I gniva prodüt üna spezcha da biera. I po dar cha quai d’eira eir a Tschlin il cas.

Fin l’ultim esa da pac’importanza perche e cun che «previsiun sabgiainta», cun che «ris-ch» o dafatta cun che «imprecauziun» cha’ls fundaturs s’han miss vi da la lavur. Il fat es chi han tut per mans quist’ouvra, chi sun gnüts da persvader al cumün ed als acziunaris da quista «idea strana» e chi han gnü success.

Sün la dumonda perche? daja amo ün’otra resposta, nempe quella dal scopo da la bieraria dad hoz:

• La bieraria daTschlin renda cuntschaint cun sia biera fich speciala, la BE Biera Engiadinaisa®, il nom Tschlin in ün vast territori da nos pajais. Illa lingua populara as discuorra da la « biera da Tschlin ».
• Uschè serva la bieraria dublamaing a las plazzas da lavur a Tschlin:
• Causa cha’l nom vain adüna plü cuntschaint daja occupaziun eir aint il turissem a Tschlin.
• La bieraria svessa spordscha plazzas da lavur als da Tschlin.

Il nom da Tschlin chi gioda vi e daplü reputaziun e plazzas da lavur dürablas pels da Tschlin sun per nus meras plü otas co dividendas surproporziunalas e la valur da las aczias. Sainza dubi vala però: Scha l’image e la lavur han dad esser da lunga dürada, sto capitar quai cun ün affar chi’d es economicamaing san. Vi da quai lavuraina.

Quists impissamaints fundamentals sun manaiats cun nos princips directivs:

«Biera da Tschlin vain da Tschlin»
«Ils da Tschlin fan la Biera da Tschlin»