Istorgia

L’idea da realisar üna bieraria a Tschlin va inavo sün ün «workshop da l’avegnir» dal cumün da Tschlin al cumanzamaint dal nouv millenni. Là es eir nada l’idea da la recloma e promoziun da vendita «Bun Tschlin». La prüma jada s’ha occupà il cussagl da cumün in settember 2003 cul proget da fabrica. Als 30 gün 2004 es gnüda confermada la fundaziun da la der Bieraria Tschlin SA tras üna documentaziun notariala.

I’s tratta d’üna società anonima cun raduond milli acziunaris ed üna chapital d’aczias da ca. ün milliun francs. La prüma radunanza generala ha gnü lö als 26 mai 2005. Là es gnü elet ün cussagl administrativ da tschinch persunas cun Angelo Andina sco prüm president. El d’eira uriundamaing chanzlist a Tschlin. Sias ideas ed sia iniziativa han cuntribui üna pruna vi dal success da la bieraria al cumanzamaint.

Als 14 settember 2004 sun gnüts postats ils indrizs per la bieraria pro la firma MBA 21 Trading, Z. Safrata, ün indschegner da bierarias da Budweis in Tschekia.

La chasa chi dà tet a la famiglia dal bierer ed a la bieraria es gnüda cumprada als 30 gün 2006. Daspö ils 1. november 2006 es Florian Geyer responsabel per la producziun. Sia professiun es maister bierer e maister malter.

Il logo, surtuot la marca dal purtret BE, la concepziun da la butiglia da biera, dal magöl da biera, dal vierchel da biera e da la documentaziun da vendita sun gnüts creats dal 2004 da SGC Süsskind da Cuoira. La marca dal purtret BE e quella dal pled BE Biera Engiadinaisa® sun gnüdas annunzchdas in settember 2008 e registradas cun success in favrer dal 2009.

La dumonda davo la biera es statta da prüma innan buna. Blers restorants e bleras butias da mangiativas in Engiadina han adüna offri nossa biera cun gronda fideltà e cun ün augmaint da success infin al di d’hoz.

I’ls ons 2005 – 2008 ha furni la bieraria 650 fin 680 hl biera, la biera standard «Biera Engiadinaisa», la biera d’inviern «Boc Dubel da Tschlin» e duos bieras da stà. Las strettas da furniziun dals ons 2007 e 2008 nun han permiss üna producziun plü gronda. Quista quantità nu basta però per surpassar la bariera da guadogn.

Il cussagl administrativ da quella jada ha tscherchà ils motivs da quistas strettas da furniziun illa limitaziun da las localitats e dals apparats. El ha gnü l’intenziun da schoglier il problem cun la fabrica d’ün nouv edifizi o cun dischloccar la bieraria a Schlarigna. Tuottas duos variantas vessan douvrà investiziuns nouvas da sur ün milliun francs. E per tuottas duos variantas haja dat gronda opposiziun. Il cumün nu vess approvà l’idea d’ün nouv edifizi. L’idea da dischloccar la bieraria es gnüda sbüttada da la radunanza generala in mai dal 2008 cull’incumbenza da tscherchar pussibiltats cun soluziuns per restar a Tschlin fin pro la radunanza generala extraordinaria dals 30 avuost 2008.

Quai nun es reuschi. Tuot il cussagl administrativ s’ha retrat culla proposta da far nouvas elecziuns, quai chi’d es lura success a la radunanza generala extraordinaria..

Il nouv cussagl administrativ s’ha miss vi da la lavur suot il motto «Biera da Tschlin vain da Tschlin». Las analisas han muossà chi fetscha dabsögn da trar trais masüras: 1. cumprar butiglias avuonda, 2. planisar ed organisar la capacità da lavur per pulir, implir ed etikettar las butiglias, 3. ingrondir la capacità dals tancs da madürar. Tuot quistas masüras sun gnüdas realisadas dal mais settember 2008 fin in avrigl 2009.

La radunanza generala 2009 ha confermà il nouv cussagl administrativ per duos ulteriurs ons in uffizi e sustgnü lur möd da proceder.

Ün on plü tard s'ha preschantà a la radunanza generala 2010 ün resultat fich allegraivel per l'on 2009: Il schmertsch es creschü per daplü da 50%, ils cuosts da persunal be per 14%. Quai voul dir üna clera meglioraziun da la productività. Our da 137'000 francs perdita l'on 2008 es gnü ün guadogn da 17'000 francs pel 2009 cun far las medemmas amortisaziuns ordinarias.

Il "turnaround" es reuschi, il glim dal guadogn ordinari nun es amo ragiunt. I va amunt.