Bun Tschlin

Bun Tschlin es ün’associaziun libra da 15 fin 20 affars pitschens chi han l’intenziun da far insembel propaganda e promoziun da vendita.

Lur missiva es sco cha’l nom rumantsch disch:

«Prodots da Tschlin vegnan da Tschlin e perquai suna buns.»

Bun Tschlin vain sustgnü finanzialmaing dal cumün politic da Tschlin, chi voul cun quai mantgnair e promouver l’iniziativa in cumün. Quai dess güdar a diminuir la depopulaziun sco eir sgürar l’avegnir economic dal cumün.

E quai grataja. Ils cumüns vaschins invilgian als da Tschlin per quista promoziun vivainta da l’economia. Aint ill’ «Allegra», il program d’arrandschamaints da l’Engiadina Bassa, chi cumpara mincha duos eivnas (dal rest eir ün’instituziun cun succes, bain fatta e perquai eir invilgiada) ha l’inserat da Bun-Tschlin sia plazza stabla. Mincha jada vain preschantà ün oter commember da l’associaziun sco eir ils logos standardisats da tuot ils commenbers – adüna cun duos custabs, sumgliant a nos BE.

Ün’ediziun da stà ed üna d’inviern da la «Gazetta-Bun-Tschlin» vain tramissa a tuot las chasadas da l’Engiadin’Ota, l’Engiadina Bassa e la Val Müstair. Sün blers marchats turistics vendan ils commembers da «Bun-Tschlin» lur chaschöls, salsiz, övs, charn, licörs, meil, cunservas, chaistinas cun regals e biera.

BE Biera Engiadinaisa® sarà probabelmaing il plü grond commember ed ha plaschair da la collavuraziun.

Bun Tschlin es ün’associaziun, gnanc’üna cumünanza d’interess sco üna «federaziun professiunala» perquai cha’ls commembers han vairamaing tuottafat differents interess. In quist sen es Bun Tschlin strictamaing federativ. Essenzial es:

Bun Tschlin funcziuna.

Bun Tschlin accumplischa amo ün oter scopo: Id es ün forum da discussiun e d’inscunter adattà per affars da Tschlin. Quia pon gnir inviadas cooperaziuns.

www.buntschlin.ch

Producents da Tschlin

Servezzans da Tschlin