Lö e situaziun

Quel chi sà, ingiò cha chi’d es,
sta stut.

Tschlin as rechatta giosom l’Engiadina Bassa. Il lö principal es situà sün ün’otezza da 1530 m a schnestra da l’En. Pro’l cumün politic toccan eir las fracziuns San Niclà, Strada, Chaflur, Sclamischot e Martina. Martina es il cumün sül cunfin vers il Tirol austriac.

Pro’l cumün appartegna ün grond territori a dretta ed a schnestra da l’En. (L’En ha sia funtana süsom l’Engiadin’Ota i’ls contuorns da Maloja. Cun seis nom rumantsch «En» da’l a tuot la vallada alpina seis nom. La via lung da l’En es l’avaina economica principala da tuot la regiun.) A Tschlin daja differenzas d’otezza da 1000 m dal fuond da la val fin sülla pas-chüra alpina chi’s rechatta sün 2500 m. L’agricultura es quia surtuot l’allevamaint da muvel, perquai haja nom da racoglier dürant la cuorta stà plü bler fain pussibel pel lung inviern. Plü bod d’eiran Tschlin e’l cumün vaschin da Ramosch il graner da l’Engiadina. Ün per paurs cumainzan darcheu a semnar üerdi (Granalpin).

Quia vivan ca. 450 persuna. La fügia dal pajais diminuis quista cifra amo. La Biera Engiadinaisa® nu dess be render il cumün da Tschlin attractiv pels turists, dimpersè eir spordscher sü quia plazzas da lavur. Üna simla lezcha dubla – turismus e plazzas da lavur – ha eir l’uniun da promoziun da vendita Bun Tschlin.

Per la bieraria, la «Bieraria Tschlin SA» significha quai üna lezcha logistica tuottafat speciala. La bun’aua es bainschi avantman, il malt, l’offa, l’alvamaint, las butiglias, las apparaturas e’l service ston però amo rivar sü qua … e quai pro minch’ora. I’s douvra autos chi tiran cun quatter roudas schi naiva e sbischa sülla via da muntogna, e chadainas e spikes süllas giassas strettas inglatschadas in cumün.

Per la paja ha nos bierer Florian Geyer, cun sia duonna e seis duos uffants aint illa bieraria immez cumün ün lö da lavur cun ün grondius panorama da muntognas.

Quel chi sà ingio chi’d es ,
sta stut …, chi exista
qua üna bieraria,
e cha quella funcziuna.