Indrizs da l’affar

La bieraria es gnüda concipida ed installada d’üna firma tscheca da Budweis e quai sül plan terrain da la chasa 24 a Tschlin. La buogliera es automatisada plainamaing cun ventils e pumpas chi pon gnir dirigits, quai voul dir la receptura e’ls cumonds sun deponats aint il computer principal. Il bierer po però adüna intervegnir. La chaldera da buglir e’ls tancs chi seguan han üna capacità da milli liters, voul dir da 10 hl.

La biera frais-cha vain lura fermentada dürant ca. trais eivnas in tancs zylindroconics, 3 à 1'000 l, 4 à 2000 l. Davo madüra la biera in tancs da squitsch orizontals, 2 dad 830 l, 4 da 1000l (daspö avrigl 2009), 4 da 1500 l. Tuot ils tancs vegnan sfraidits cun aua da glatsch. Il computer principal registrescha l’andamaint da la temperatura da mincha tanc.

Our dals tancs da squitsch vaina imbutiglià a man cun ün’apparatura mechanica. Pro las apparaturas tocca eir il muglin per rumper il gran pel malt güst’avant co til metter a buglir, la maschina da sfraidir cun recipiaints d’aua da glatsch e cun lingias chi mainan l’aua da glatsch pro’ls tancs e pro la maschina da lavar las butiglias.

Süllas butiglias vain lura missa ün’etiketta cun üna «binderina», avant ch’ellas vegnan implidas aint illas harassas in quantitats da 20 butiglias a mez liter o 24 butiglias d’ün terz liter. Sün ün palet tenor normas europeanas han lö 8 cluchers cun 5 harassas. Scha quai sun butiglias da mez liter dà quai in tuot 4 hl biera sün mincha palet, insembel cul pais da las butiglias e’ls palets paisa tuot insembel ca. üna tonna.

Usche ha la bieraria üna producziun nominala teoretica da 2000 hl l’on, scha la cumprita es constanta. Nus vain però dachefar cun üna gronda dependenza stagiunala cun üna «biera da turissem», e quai da stà e d’inviern.