Ils paurs da bio Gian e Gaby Denoth davant ün da lur chomps dad üerdi a Tschlin. Ils chavagls nu toccan pro be our da «nostalgia». L’inviern tils douvra Gian per manar laina in territoris stips. Quella lavur nu’s poja far cun maschinas. La stà douvran ils chavagls eir movimaint. Perquai vegnan els douvrats per la lavur sülla champogna.

Gran Alpin

Il malt chi dà – dasper la bun’aua, l’offa e la chüra dal bierer – a la biera seis aroma special e (!) l’alcohol, es il üerdi chi vain sechantà subit davo ch’el ha cumanzà a prüir. Il üerdi es ün gran muntagnard chi crescha sü plü ot co’l furmaint. Quai vezzaina vi da la cuntschainta specialità grischunaisa, la «schoppa da giuotta».

Nos malt deriva exclusivamaing dad üerdi grischun chi’d es creschü e madürà sün ün’otezza sur mar da sur 1000 m. Causa cha’l üerdi crescha quia plü plan co giò la Bassa survain el eir daplü sulai co tschel üerdi e quai surtuot sulai da muntogna.

Ils paurs Grischuns chi prodüan gran s’han units ill’associaziun da «Gran Alpin». Il nom voul dir per rumantsch: Gran da nossas alps. La paura Gaby Denoth da Tschlin e seis hom ans pon furnir ca. 10% da nos malt. Dal 2008 fin 2010 es ella statta commembra dal cussagl administrativ – "al lö" – da la Bieraria Tschlin SA.

Nos sömmi es, cha sün bleras terrassas da Tschlin e Ramosch, ingiò chi crescha hoz amo erba gniss in avegnir semnà üerdi per la Biera Engiadinaisa®. Quistas terrassas as nomnaivan plü bod il graner da l’Engiadina. Displaschaivelmaing sun quellas massa strettas eir per las plü pitschnas maschinas da scuder.